Кока-Колагийн нууц жор нь чанарын системдээ байдаг. Чанартай бүтээгдэхүүн үйлдвэрлэнэ гэдэг нь хийж байгаа ажил, бүтээгдэхүүн бүр нь чанартай байхаас гадна ажилтнуудын эрүүл мэнд, аюулгүй байдлыг хангаж, байгаль орчинд ээлтэй, хариуцлагатай үйл ажиллагаа эрхлэх явдал юм.
Бидний алсын хараа бол хүмүүсийн уух дуртай брэнд, бүтээгдэхүүнийг үйлдвэрлэж, хэрэглэгчдийг бие, сэтгэлээр нь сэргээхийн зэрэгцээ хэрэглэгч бүрд бүтээгдэхүүний чанар, аюулгүй байдалд итгэх итгэлийг бий болгох явдал юм. Бидэнтэй хамтран ажилладаг түнш, нийлүүлэгч, борлуулагч, үйлчилгээ үзүүлэгч болон ажилтнууд үйлдвэрлэлийн үйл ажиллагаанд шууд оролцдог эсэхээс үл хамааран чанар, хүнсний аюулгүй байдлыг хамгаалж, хэрэглэгчдэд өгсөн бидний амлалтыг хэрэгжүүлэхэд чухал хувь нэмэр оруулдаг. Ийнхүү бид түүхий эдээс эцсийн бүтээгдэхүүн хүртэлх бүх явцад чанар, стандартыг ягштал мөрдөж, “Хаанаас ч авахад найдвартай, төгс бүтээгдэхүүн” хүргэхийн төлөө хичээнгүйлэн ажиллаж байна.
Кока-Колагийн чанарын стандартын онцлог нь үйлдвэрлэлийн түүхий эд, туслах материалын нийлүүлэгчээс эхлээд хэрэглэгчийн ширээн дээр очих хүртэлх бүх үйл ажиллагаанууд стандартын шаардлага хангах ёстой гэдэгт оршдог. Тэр нь Чанар, Хүнсний аюулгүй байдал, Байгаль орчин, Хөдөлмөрийн аюулгүй байдал гэсэн үндсэн 4 хэсгээс бүрддэг юм.
Манай компани 2009 оноос хойш Олон улсын чанарын менежментийн тогтолцоонуудыг үйл ажиллагаандаа нэвтрүүлсээр ирсэн бөгөөд жил бүр магадлан шалгалтуудад орж, итгэмжлэгддэг юм.
“М-Си-Эс Кока-Кола” компанийн үйлдвэрийн дотоод хяналтын лабораторийн ажиллагсдыг мэргэжлийн түвшинд ажиллаж байгаа эсэхийг ур чадварын тестийн хөтөлбөрөөр тогтмол шалгаж, баталгаажуулдаг.
1. Мэдрэхүйн үнэлгээ: Их Британийн (United Kingdom) Flavor Activ компанийн ур чадварын хөтөлбөрийн хүрээнд улирал тутам мэдрэхүйн үнэлгээ хийж, баталгаажуулна.
2. Нян судлалын шинжилгээг жилд нэг удаа Их Британи улсаас авдаг. Тус шинжилгээний ур чадварыг баталгаажуулах зорилгоор Их Британийн LGC AXIO Proficiency Testing (AXIO PT) компаниас жилд нэг удаа, мөн БНХАУ-ын Шанхай хотод байрлах Asia Pacific Technical Center (APTC) лабораториос жилд нэгээс хоёр удаа зохион байгуулдаг хөтөлбөрт тус тус хамрагддаг.
3. Физик, химийн ур чадварын хөтөлбөр: Тус хөтөлбөрийн хүрэнд жилд нэгээс хоёр удаа БНХАУ-ын Шанхай хотод байрлах хөндлөнгийн лаборатори "Asia Pacific Technical Center"-ээс дээжүүд авч, шинжээч нарын ур чадварыг шалгадаг.
Кока-Кола компанийн Монгол дахь төлөөлөгчийн газар зах зээлээс бүтээгдэхүүнийг санамсаргүй байдлаар сонгон авч, БНХАУ-ын Шанхай хотод байрлах хөндлөнгийн Asia Pacific Technical Center (APTC) лабораторид чанар, аюулгүй байдлын нарийвчилсан шинжилгээнд тогтмол хамруулдаг. Манай үйлдвэр нь “Бага эрсдэлтэй” ангилалд хамаардаг тул Стандарт, хэмжил зүйн газрын Нийслэлийн лаборатори болон Хүнсний аюулгүй байдлын үндэсний лавлагаа лаборатори (ХАБҮЛЛ)-д жил бүр түүхий эд, сав баглаа боодол болон бэлэн бүтээгдэхүүнээс дээж шинжилгээ хийлгэж, үр дүнд үндэслэн чанар, аюулгүй байдлын хяналтыг хэрэгжүүлэн ажилладаг.
Монгол Улсын Хүнсний аюулгүй байдлын үндэсний лавлагаа лабораториос жилд 1 удаа нян судлал болон химийн шинжилгээ хийж гүйцэтгэн, химич микробиологич нарын ур чадварыг шалгадаг. Хими, микробиологийн иж бүрэн лаборатори нь ISO/IEC 17025:2018 (MNS ISO/IEC 17025:2017) стандартын дагуу итгэмжлэгдэж, үйл ажиллагаагаа баталгаажуулсан.
Бүтээгдэхүүний үйлдвэрлэлд ашиглагдах бүхий л боловсруулалтын усыг ХБНГУ-ын LABORUNION болон БНХАУ-ын Шанхай хот дахь SGS лаборатори, нүүрсхүчлийн хийг БНХАУ-ын Далиан хотын Gas Quality supervision & Inspection Center for chemical industry, ХБНГУ-ын LABORUNION лабораториудад тус тус шинжилгээнд хамруулж, чанарыг баталгаажуулдаг билээ.
